జీవితమనే గణితపుస్తకంలో అన్నీ సందేహాలే?

మనుషులందరూ తప్పుడు లెక్కలే చేస్తున్నారు ఎందుకో?

గుణించాల్సిన ప్రేమను భాగించి,
కూడాల్సిన అనుబంధాలను తీసివేస్తున్నారు.

ఆప్యాయతలకు అసలే కాదు వడ్డీ అయిన కట్టట్లేరు కనీసం.

ఆలోచనలెప్పుడూ సమాంతర రేఖలే,
చచ్చేదాక కలవరు కాబోలు.

మనసుల్ని ఖండించే వక్రరేఖలు ఎందరో లెక్కేలేదు.

కోపాలకు కామాలేనా?
ఫుల్స్టాపులెందుకు పెట్టరు?

అవసరాలకోసం ఆశయాల్ని సంవృత పటాల్లో బంధిస్తే?
భారీ మనసులకు బయటికి వెళ్లే దారేది?

సాటి మనిషిలో సమత కోసం వెతక్కండి,
అందరూ మాత్రికల రిక్తికలే.

కిరణంలా సూటిగ ఉండాల్సిన జ్ఞానం,
వృత్తంలా గుండుబారింది.

జీతాల లెక్కలతో,
జీవితాలు దొర్లిస్తుంటే?
వయసు పెద్దంకెను చెప్పకుండానే చేరి,
చటుక్కున సున్నా అయిపోతుంది.

గుట్టీ సుబ్రహ్మణ్యం శర్మ......